Mentje - Kind van die Pas-Opkamp

Mentje, kind van Pas-Opkamp, bied moontlikhede om ʼn uitstekende fliek te maak, ook omdat die verloop na die oorlog verder afspeel in Suid-Afrika, op die plaas Buffelspoort, waar dit in Hoofstuk 1 begin het. Die boek het ʼn knop op my maag gesit wat eers laat los het aan die einde van die boek, hoewel Irma Joubert slim is, sy laat my uitsien na die derdie boek in haar oorlogstrilogie.

Navorsing en geskiedenisfeite is deurgaans uitstekend geïntegreer in die verhaal, in teenstelling met van Joubert se eerste boeke, waar dit na die eerste derde vir my gevoel het asof ek nou deur die notas lees wat vooraf gemaak is tydens die navorsing vir die boek.

Die skrywer slaag uitstekend daarin om ‘n slim, dapper dogtertjie se leefwêreld te verbeel. Aanvanklik het ek gedink daar slaan nêrens meer wysheid deur as wat verwag kan word van ‘n slim dogtertjie wat in uiterste omstandighede moet oorleef nie. Later in die boek het ek tóg gedink Mentje is emosioneel ʼn amper bomenslike sterk en wyse kind wat my soms laat wonder het oor die geloofwaardigheid van die karakter.

Met hierdie boek wys Irma Joubert weer waarom sy tans ons gewildste historiese romanskrywer is.